Bucks mi-sweep sa Heat

CEBU, Philippines — Si Giannis Antetokounmpo mirehistro sa labing una niyang triple-double sa NBA playoffs sa dihang gi-sweep sa Milwaukee Bucks ang Miami Heat bugti sa 120-103 nga kadaogan sa Game 4 sa ilang best-of-seven Eastern Conference playoff series kagahapon didto sa American Airlines Arena sa Miami, Florida.

Ang gibansagan nga "Greek Freak" mikadlit og 20 puntos, 12 ka rebounds ug 15 ka assists sa makasaysayanon nga duwa sa iyang karera.

Si Brook Lopez mikolekta og 25 puntos samtang sila si Khris Middleton ug Bryn Forbes nagkumboya og 42 puntos alang sa Bucks nga madasigon mi-rally human mabiyai og 12 puntos sa first half aron tagakon ang Heat.

Gumikan niini, ang Bucks mi-abante sa ikaduhang hugna diin ilang sangkaon ang modaog sa serye tali sa Brooklyn Nets ug Boston Celtics.

Didto sa Portland, si Norman Powell mitabla sa iyang career-high 29 puntos sa dihang gibugha sa Blazers ang bisitang Denver Nuggets, 115-95, aron tablahon ang ilang serye sa baraha nga 2-2. Dako sab og naambag si CJ McCollum nga dunay 21 puntos ug ingon man si Jusuf Nurkic nga mi-iskor og 17 alang sa Blazers.

Sa laing resulta, si Joel Embiid mitali og playoff career-high 36 puntos aron pangulohan ang 132-103 nga demolisyon sa Philadelphia 76ers sa nagkayuring nga Washington Wizards nga nakahatag kanila og 3-0 nga bentaha sa kaugalingon nilang serye.

Samtang si Donovan Mitchell mipupo og 29 puntos sa dihang gipayaka sa Utah Jazz ang Memphis Grizzlies, 121-111, aron pagkontrola og balik sa ilang serye, 2-1.