Middleton misalbar sa Bucks

Mavs naka-una sab sa LA Clippers sa NBA playoffs

CEBU, Philippines — Si Khris Middleton milansang sa krusyal niyang itsa sa nahibilin nga usa ka segundo sa overtime aron aswaton ang Milwaukee Bucks sa kulbahinam nga daog batok sa Miami Heat, 109-107, pagsikad sa best-of-seven NBA playoff series kagahapon didto sa Fiserv Forum sa Milwaukee, Wisconsin.

Gihuman ni Middleton ang duwa uban ang 27 puntos, unom ka rebounds, ug unom sab ka assists samtang si Giannis Antetokounmpo, nga dunay dili gipamati sa wala niyang kamot, mibahug og 26 puntos, 18 ka rebounds ug lima ka assists.

Dako sab og natampo si Jrue Holiday nga mipupo og 20 puntos ug ingon ang sentong si Brook Lopez nga mikadlit og 18 puntos.Mosuway sila pagposte og 2-0 nga bentaha sa serye karong Martes didto gihapon sa ilang balwarti.       

Sa West, ang Dallas Mavericks nagsandig sa kamangtas ni Luka Donkic aron tumbahon ang Los Angeles Clippers, 113-103, aron pagkulit og 1-0 nga bentaha sa ilang serye.

Si Donkic mirehistro og triple-double uban ang 31 puntos, 11 ka assists ug 10 ka rebounds, samtang si Tim Hardaway miamot og 21 puntos apil na niini ang lima sa siyam niya ka tres.

Wala sab magpa-alkansi si Dorrian Finney-Smith nga mikolekta og 18 puntos ug lima ka rebounds alang sa Mavs. Ang labing nindot kay si Smith kausa lamang masipyat sa lima niya ka tres.

Nahagba ang Clippers bisan pa man sa impresibong salida sa ilang superstars. Si Kawhi Leonard mikimada og 26 puntos, 10 ka rebounds, lima ka assists ug upat ka steals samtang si George dunay 23 puntos, unom ka rebounds ug ka asssists.

Si Rajon Rondo mitali og 11 puntos, upat ka assists ug upat ka rebounds sa pilderong kawsa.