Poligrates mosalida sa Alayon Zamboanga
CEBU, Philippines — Gipalig-on sa Alza Alayon Zamboanga Del Sur ang ilang puwersa sa umaabot nga Mindanao leg sa 2021 Chooks-to-Go Pilipinas VisMin Super Cup.
Kini human ilang gikuha ang serbisyo sa dekalibreng Cebuano pointguard nga si Eloi Poligrates ug Dan Sara aron motimon sa ilang backcourt.
"We expect Eloi and Dan to lead our team in the VisMin Super Cup," magtud pa ni Alayon Zamboanga del Sur head coach Rodolfo Abad, Jr.
Gawas nga kilas ug maayo modala og bola, ang kanhi PBA player nga si Poligrates eksplosibo sab kon pinuntosay ang hisgutan. Ang 6-footer nga garbo sa Poro, isla sa Camotes mipirma og kontrata sa Rizal sa miaging tuig alang sa 2021 Chooks-to-Go MPBL Mumbaki Cup.
Samtang si Sara maoy floor leader sa Batangas-Tanduay atol sa MPBL Lakan Cup.
Sul-ot ang uniporme sa Zamboanga ning higayona, makauban nilang Poligrates ug Sara sila si San Juan big man Jeff Tajonera, kanhi ex-Nueva Ecija gunner Adrian Celada, ug ingon man sila si Eric Bangcoyan, Russel Moneva, Shawn Labisores, Orly Biwang, Charles Pepito, Mario Junio, Garexx Puerto, Levert Lintayan, Daryl Cruz, Vanrolph Amoquis, Kenith Dela Cruz, Ruben Caritan, Archie Cabrilla, Hans Sison, JR Raflores, John Calvin Jabello, Klent Singedas, ug Constacio Lumingkit.
- Latest
