Kouame nagpanikad moduwa isip Pinoy

CEBU, Philippines — Karon nga usa na siya ka sertipikadong Pinoy, ang sentro sa Gilas Pilipinas nga si Angelo Kouame dili na makapaabot pa nga moduwa alang sa iyang mga kababayan sa mga internasyonal nga kompetisyon sama sa FIBA Asia Cup Qualifiers sunod bulan didto sa Clark.

Si Kouame nagkanayon nga dili masukod ang gibati niyang kalipay human madawat ang balita nga gipirmahan na ni Presidente Rodrigo Duterte niadtong Martes ang balaod nga naghatag kaniya og Philippine citizenship pinaagi sa Republic Act 11543.

Alang ni Kouame, dinhi pa magsugod ang iyang misyon isip usa ka lig-ong puwersa nga madugang sa Gilas.

“Let’s keep moving, business ain’t done… Puso!!!” dason pa sa 6'10" nga si Kouame sigun sa taho sa The Phippine STAR.

Kuhaonon na lang karon sa 23-anyos nga si Kouame ang gikinahanglan nga mga dokumento aron pormal na siyang makarepresenta sa Pilipinas sa umaabot nga mga torneyo.

Una sa listahan ni Kouame mao ang FIBA Asia Cup Qualifiers karong Hunyo 16-20  ug dayon ang FIBA Olympic Qualification Tournament karong Hunyo 29 ngadti sa Hulyo 4 didto sa Serbia.