Philippines mo-host sa Asian Volleyball Championship

CEBU, Philippines — Ang Pilipinas maoy mo-host sa 21st Asian Senior Women’s Volleyball Championship karong Agosto didto sa Pampanga.

Nasilyo kining maong kalamboan human nag-ambahan ang kagamhanan sa probinsiya sa Pampanga, ang Bases Conversion and Development Authority (BCDA), ug ang Philippine National Volleyball Federation (PNVF). Si Pampanga Governor Dennis Pineda, BCDA Vice President Arrey Perez ug PNVF President Ramon “Tats” Suzara buot nga ipahigayon ang prestihiyosong torneyo karong Agosto 29 ngadto sa Septiembre 5.

Matud pa ni Suzara nga tulo ka binyu ang gamiton sausa ka semana nga aksiyon. Kini mao ang San Fernando Convention Center, Subic Gym ug Angeles University Foundation Sports and Cultural Center. Ang nasud katapusang naka-host sa maong kompetisyon niadtong 2017 didto sa Biñan, Laguna diin ang Japan maoy nakampiyon.

Ang pambato sa mga Pinoy magsugod sa ilang pagbansay-bansay alang sa torneyo sunod bulan.