Bolts nangandam na sa PBA Season 46

CEBU, Philippines — Ang Meralco Bolts misikad na sa ilang preparasyon alang sa PBA Season 46.

Niadtong Domingo, ang team miasdang ngadto sa Laoag, Ilocos Norte alang sa 10 ka adlaw nilang training camp.

Gumikan niini, ang Meralco maoy labing unang PBA team nga makapahigayon og scrimmage sa dili pa mo-arangkada ang lab-as nga season sa liga sunod bulan.

Ang Bolts adto mohimo sa ilang bubble training sa Laoag Centennial Arena, nga nagka-host na og PBA regular ug All-Star games sa miagi. Adto sila mopuyo sa Fort Ilocandia Resort and Hotel.

Ang pagtaak na Bolts sa Laoag nahimong posible tungod sa suporta ni Matthew Manotoc, ang gobernador sa Ilocos Norte nga miabli sa ilang pultahan ngadto sa mga PBA teams nga gustong moestablisar og training camp sa ilang lugar ubos sa isktriktong patakaran sa panglawas ug kaluwasan.

"Our goal is to lead the way and show how sports and safety can go hand in hand," anunsiyo pa sa Bolts sa opisyal nilang Instagram account sa wala pa mobiyahe sa Laoag. "Back to basketball together, leading the way together, staying safe together."