GM Wesley So Cup: Cebu teams gisubhan og daog
CEBU, Philippines — Gisubhan og daog ang mga pambato sa Sugbu nga Toledo City Trojans, Cordova Dutchess Dagami Warriors, ug Lapu-Lapu City Naki Warriors sa GM Wesley So Cup, ang reinforced conference sa 1st Professional Chess Association of the Philippines (PCAP) online tournament nga giduwa sa lichess platform.
Gipangulohan ni Iranian Grandmaster Amir Bagheri, ang Trojans ni team owner Engr. Mardee Gacang de la Peña ug gipaluyohan sa Toledo LGU ubos sa liderato ni mayor Joie Perales milampaso sa Cebu City Machers, 15.5-5.5.
Ang Trojans ni team captain Bonn Rainauld Tibod nakatikang sa Southern Division semifinals sa miaging PCAP All-Fillipino Conference ug naglaraw sa mas taas nga puwesto ning higayona kaabag si Bagheri.
Lain pang naglangkob sa Trojans mao sila si playing co-team owner Atty. Jeah Jean Gacang, team manager Felix Poloyapoy Jr., International Master Rico Mascariñas, Rogelio Enriquez Jr., managsoong Ronald ug Rommel Ganzon, Richard Natividad, Glicerio Pardillo Jr., Christopher Tubalado, ug Jinky Catulay.
Sa uban pang mga resulta, ang Cordova Dagami Warriors mikastigo sa Surigao Fianchetto Checkmates, 17-4, samtang ang Naki Warriors mipakaging sa Mindoro Tamaraws, 12-9.
- Latest
