Bulls ginhawa pa

CEBU, Philippines — Buhi pa ang paglaum sa Chicago Bulls alang sa play-in tournament human ilang gisungag ang Toronto Raptors, 114-102 sa NBA kagahapon didto sa United Center sa Chicago, Illinois.

Ikaupat na kini ka daog sa Bulls sa lima ka duwa.

Si Zach LaVine midaro og 24 puntos, apil na ang 16 puntos sa second half,  samtang si Lauri Markkanen miungad og 20 puntos sa Bulls nga duha na lang ka duwa ang biya batok sa Washington Wizards alang sa ika-10 nga dapit sa Eastern Conference ug sa katapusang lingkoranan sa play-in tournament.

Misalida sab si Coby White, kinsa mikolekta og 17 puntos ug 10 ka assists, si Nikola Vucevic mitampo og 16 puntos ug 16 sab ka rebounds sa Bulls nga mipahimulos og 24 puntos nga labaw sa third period. 

Si Stanley Johnson ang nangu sa Raptors uban ang career-high 35 puntos. Miposa siya og unom ka tres ug milangkat og 10 ka rebounds.

Ang rookie nga si Jalen Harris mitimbre og personal-best ng 17 puntos, si Malachi Flynn miambit og 16 puntos sa Raptors nga adunay walo ka pilde sa siyam ka duwa.

Wala hinuon moduwa ang ilang unom ka mga tirador nga silang Pascal Siakam, Fred VanVleet, Kyle Lowry, OG Anunoby, Gary Trent Jr. ug Chris Boucher tungod sa tagsa-tagsa nila ka injury.

Didto sa Phoenix, si Devin Booker kalma kaayong mipasud sa iyang duha ka free throws sa nahabiling 2.4 segundos sa fourth quarter aron hatagan ang Phoenix Suns og  118-117 nga kadaogan batok sa Portland TrailBlazers didto sa Talkstick Resort Arena sa Phoenix, Arizona.

Gipangulohan ni Chris Paul ang daog nga mikabkab og 26 puntos sa iyang 11-of-14 shooting. Si Mikal Bridges mitampo og 21 puntos ug 11 ka rebounds, samtang si Booker adunay 18 puntos sa Suns nga biya og usa ka duwa sa Utah Jazz alang sa No. 1 seed sa Western Conference.

    Si Damian Lillard  mitala og game-high 41 puntos sa iyang 16-of-23 shooting alang sa Portland, kansang lima ka sunod-sunod nga daog nabugto. Si CJ McCollum miambit og 27 puntos sa Raptors nga nahimutang sa ikaunom nga dapit sa Western Conference uban ang 41-30 win-loss record.