PBA teams mahimo nang makapraktis sa Metro Manila

CEBU, Philippines — Mahimo na nga makapraktis ang mga koponan sa PBA sa Metro Manila human ang NCR Plus gipaubos na sa General Community Quarantine (GCQ) gikan sa Mayo 15 hangtod 31.

Gipahibalo ni Presidente Rodrigo Duterte ang bag-ong klasipikasyon sa Metro Manila ug sa kasilinganang mga probinsiya sa Rizal, Laguna, Cavite ug Bulacan atol sa iyang Talk to the People niadtong Huwebes sa gabii.

Ning bag-o lang, ang PBA gitugotan na sa Inter-Agency Task Force nga mopahigayon og praktis sa mga lugar nga ubos sa GCQ ug modified general community quarantine (MGCQ) nga naghawan sa dalan aron masugdan ang 2021 season.

Nag-andam na ang Batangas City isip binyu sa mga praktis sa PBA teams sa dihang ang  Metro Manila  gibutang pa sa modified enhanced community quarantine (MECQ).

Ning maong kalamboan, ang PBA teams dili na kinahanglan pa nga moadto sa habagatan o gani sa amihanan sa Ilocos Norte nga nitanyag aron mo-host sa mga praktis sa liga ubos sa usa ka bubble set-up human sa reclassification sa NCR Plus.