Mga kandidato sa 2021 SEA Games isasabak ng ABAP sa ASBC sa Dubai

MANILA, Philippines — Bukod kay Olympic Games-bound Eumir Felix Marcial, isasabak din ng Association of Boxing Alliances of the Philippines (ABAP) sa torneo sa Dubai ang iba pang national bo­xers na lalaban sa 31st Southeast Asian Games sa Hanoi, Vietnam.

Si Marcial, kasaluku­yang nagsasanay sa Zam­boanga City bilang pagha­handa sa Olympics sa Tok­yo, Japan, ang babandera sa delegasyong ipapadala ng ABAP para sa ASBC Elite Men and Women Boxing Championships na nakatakda sa Mayo 21 hanggang Hunyo 1.

Makakasama ni Marcial (75-kilogram) sa kampanya ng national men’s team sa ASBC sina Junmilardo Ogayre (56kg), Mark Lester Durens (49kg), Marvin Tabamo (52kg), Jere Samuel Dela Cruz (60kg) at John Paul Panuayan (60kg).

Makakatulong naman ni AIBA Women’s World Boxing Championships gold medalist Josie Gabuco (48kg) si Maricel Dela Torre (60kg) sa women’s division.

“We have put together a team, some will come from Manila, some from Baguio, Eumir is training right now in Zamboanga City,” ani ABAP secretary-general Ed Picson.

“They are also candidates for the (Vietnam) Southeast Asian Games. This is a good preparation for them,” dagdag pa nito.

Sina Olympic-bound Irish Magno, Nesthy Petecio at Carlo Paalam ay nasa training camp sa Thailand at minabuti ng ABAP na huwag na silang ilaban sa ASBC.

“There is a problem with quarantine,” ani Picson. “You’ll lose whatever momentum you gained from the bubble (Calamba, Laguna) and the training camp, and that sets us back.”

Kung lalaban sina Magno, Petecio at Paalam sa ASBC ay kailangan nilang sumailalim sa 14-day quarantine period sa kanilang pagbabalik sa training camp sa Thailand.