Nuggets, clippers itinulak ng hawks sa playoffs
NEW YORK - Tuluyan nang umabante ang Denver Nuggets at Los Angeles Clippers sa playoffs sa Western Conference dahil sa panalo ng Atlanta sa Portland.
Humigpit ang hawak ng Nuggets (43-22) at Clippers (43-22) sa No. 3 at 4 spots sa Western Conference para makasama sa playoffs ang Utah Jazz (47-18) at Phoenix Suns (46-18).
Sa Atlanta, kumonekta si Danilo Gallinari ng pitong triples para sa kanyang 28 points sa paghatid sa Hawks (36-30) sa 123-114 panalo sa Blazers (36-29).
Lumasap man ang Denver ng 89-93 pagka-talo sa nagdedepensang Lakers (37-28) sa pagbibida ni Anthony Davis na tumapos ng 25 points ay sigurado na sila sa playoffs, salamat sa Atlanta.
Pinangunahan ni Nikola Jokic ang Denver sa kanyang 32 points.
Sa Salt Lake City, humakot si Rudy Gobert ng 24 points at 15 boards para pamunuan ang Jazz sa 110-99 paggiba sa San Antonio Spurs (31-33).
Sa Chicago, umiskor sina Tobias Harris at Seth Curry ng pinagsamang 41 markers sa 106-94 tagumpay ng Philadelphia (44-21) sa Bulls (26-39).
Sa New Orleans, nag-laglag si Stephen Curry ng 41 points sa 123-108 pagpapabagsak ng Golden State Warriors (33-32) sa Pelicans (29-36).
Sa Washington, nag-latag si Russell Westbrook ng 14 points, career-high 21 rebounds at career-high-tying 24 assists para sa kanyang league-leading 32nd triple-double sa season sa 154-141 pananaig ng Wizards (30-35) sa Indiana Pacers (30-34).
Sa Memphis, naglista si Julius Randle ng 28 points at may 25 markers ni Derrick Rose sa 118-104 pagwawagi ng New York Knicks (37-28) sa Grizzlies (32-32).
Sa Detroit, nagsalansan si Mo Bamba ng mga career-highs na 22 points at 15 rebounds para banderahan ang Orlando Magic (21-44) sa 119-112 pagwasak sa Pistons (19-46) sa duwelo ng mga talsik nang koponan.
- Latest
