Mayweather saludo kay Pacquiao

MANILA, Philippines — Tinukoy ni dating world champion Floyd Mayweather Jr. si eight-division world champion Manny Pacquiao bilang “best fighter” na nakalaban nito sa kaniyang buong buhay.

Pinuri ni Mayweather ang bagsik ng kamao ni Pacquiao na pangunahing armas nito sa laban. “The best fighter I ever fought probably was Manny Pacquiao,” ani Mayweather sa panayam ni Gillie Da King.

Noong 2015, natupad ang inaabangang paghaharap nina Mayweather at Pacquiao.

Nakuha ng American pug ang unanimous decision win laban kay Pacquiao.

Subalit naging maugong ang balita sa pag-amin ni Pacquiao na may iniinda itong injury sa balikat dahilan upang hindi nito maibuhos ang lahat ng kanyang pwersa.

Gayunpaman, ramdam na ramdam ni Mayweather ang lakas ng mga suntok ni Pacquiao sa kanilang 12-round fight.

Humanga si Mayweather sa bilis at liksi ni Pacquiao sa ibabaw ng ring. “It’s because of his movement. He’s a hell of a fighter and I can see why he won so many fights and I can see why he’s going down as a hall of famer. It’s just certain moves that he makes,” ani Mayweather.

Sinubukan ng ilang boxing promoters na maikasa ang muling paghaharap nina Mayweather at Pacquiao para sa isang blockbuster rematch.

Ngunit makailang ulit itong naudlot at isa nang dahilan ang retirement ni Mayweather.

Huli itong lumaban noong 2017 sa aktuwal na 12-round fight nang itarak nito ang 10th round knockout win kontra at Ultimate Fighting Championship star Conor McGregor.