Tatum mitala'g career-high 60 puntos
CEBU, Philippines — Nalabwan ni Jayson Tatum ang 50 puntos nga natala ni Kevin Porter Jr. dihang mipabuhagay kini og 60 puntos sa 143-140 nga kadaogan sa Boston Celtics batok sa San Antonio Spurs, 143-140 didto sa TD Garden sa Boston, Massachusetts.
Dili hinuon sayon ang kadaogan sa Celtics kay miagin pa kini og overtime.
Si Jaylen Brown miposa og usa ka 3-pointer sa nahabiling 16.7 segundos sa overtime alang sa Celtics nga mibangon human malubong og 32 puntos aron pagbuntog sa Spurs.
Si Tatum, kansang niaging career best nga 53 puntos batok sa Minnesota Timberwolves niadtong Abril 9, miiskor og 21 sa fourth period, dayon mipuno og 10 sa overtime uban ang duha ka free throws sa nahabiling kuwatro segundos maoy nagselyo sa daog.
Si Brown mitapos uban ang 17 puntos, si Marcus Smart mihimo'g 10 puntos ug 12 ka assists ug si Aaron Nesmith adunay 16 puntos ug unom ka rebounds sa Boston.
Igo lang miiskor og otso puntos si Tristan Thompson, apan ang iyang 15 ka rebounds dako'g natabang aron ipahiluna ang Celtics sa ikaunom nga dapit sa Eastern Conference standings.
Si DeMar DeRozan mirehistro og 30 puntos ug 14 ka assists sa Spurs. Sila si Dejounte Murray ug Lonnie Walker IV mitampo'g 24 puntos matag usa ug si Jakob Poeltl adunay 15 puntos ug 10 ka rebounds sa napildeng Spurs.
- Latest