Gerald Anderson moduwa sa VisMin Super Cup
CEBU, Philippines — Ang sikat nga aktor nga si Gerald Anderson moduwa sa Mindanao leg sa 2021 Chooks-to-Go Pilipinas VisMin Super Cup nga gikatakdang mosikad sa Mayo 25 didto sa Dipolog City, Zamboanga del Norte.
Mopakita siya og aksiyon uban sa team nga gipaluyohan sa Brew Authoritea nga mikompirma nang mosalmot sa labing unang propersyonal nga liga sa basketbol sa nasud nga nakabasi sa habagatan.
Sa pagka karon, nangita pa hinuon ang Brew Authoritea og lokal nga kagamhanan nga ilang irepresenta gumikan kay nibalibad man ang Cagayan de Oro City.
Ang 32-anyos nga si Anderson kanhi miduwa uban sa Imus Bandera sa 2019-2021 Chooks-to-Go Maharlika Pilipinas Basketball League (MPBL) Lakan season.
Ubos sa Brew Authoritea, ikauban ni Anderson ang kanhi niya mga teammates nga sila si JR Cawaling, Ronjay Buenafe, Mac Baracael, Riel Cervantes, Joseph Sedurifa ug Paul Sanga.
Anaa sab sa ilang line-up sila si Lucas Tagarda, Ralph Salcedo, Francis Munsayac, Mark Sarangay, Brylle Meca, Andro Catipay, Andoy Estrella ug John Gonzaga.
- Latest