PSC suportado pa rin si Marcial

MANILA, Philippines — Tuluy-tuloy ang pagsuporta ng Philippine Sports Commission (PSC) kay middleweight Eumir Felix Marcial para sa pagsuntok nito sa kauna-unahang gold medal ng bansa sa Olympic Games.

“His allowance has been continously given to him and I think also with the Armed Forces of the Philippines as to his status,” wika ni PSC Executive Director Atty. Guillermo Iroy patungkol kay Marcial.

Ginagawa ito ng PSC bagama’t pumirma na ang 24-anyos na tubong Zamboanga City sa isang six-year contract sa MP Promotions ni Manny Pacquiao noong Hulyo ng 2020.

Sumabak si Marcial sa isang six-month training sa ilalim ni Hall of Fame trainer Freddie Roach sa Wild Card sa Los Angeles bilang isang pro boxer at kamakailan ay umuwi sa Pilipinas.

Suportado rin ng Association of Boxing Alliances in the Philippines (ABAP) si Marcial para sa paghahanda nito sa 2021 Olympics sa Tokyo, Japan sa Hulyo 23-Agosto 8.

“ABAP is willing to give Marcial the necessary support,” wika ni Iroy. “For as long as ABAP will endorse him and the (PSC) Board will approve it, there is no problem.”

Si Marcial, ang 2019 Southeast Asian Games gold medalist, ang isa sa sinasabing may malaking tsansang makapagbigay sa bansa ng kauna-una-hang Olympic gold.

Maliban kay Marcial, ang iba pang national boxers na lalaban sa 2021 Tokyo Olympics ay sina flyweight Irish Magno, featherweight Nesthy Petecio at light flyweight Carlo Paalam. Bilang bahagi ng kanilang pagha-handa ay gumagawa ang ABAP ng paraan para maisalang sila sa Asian Boxing Championships na inilipat sa Dubai mula sa India.