Roxas Vanguards lig-ong puwersa sa Super Cup

CEBU, Philippines — Wala man tuod sila'y mga bitoon sa ilang line-up apan uban ang solidong teamwork, ang Roxas Vanguards mipasalig nga usa sila ka lig-ong puwersa sa labing unang season sa Pilipinas VisMin Super Cup.

Ang Roxas, lungsod sa Zamboanga del Norte nga gipangan sa kanhi presidente sa Pilipinas nga si Manuel A. Roxas, usa sa siyam ka teams nga mopakita'g aksiyon sa Mindanao leg sa Super Cup nga kasamtangang gisuspenso sa Games and Amusements Board,   apan giplano nang sugdan sa Mayo 25 samtang gipaabot ang pagtugot sa GAB.

Ilang harungon mao ang Pagadian Explorers, Cagayan de Oro Rafters, Sindangan Saints, Zamboanga City Los Valientes, Basilan Peace Riders, Ozamiz Cotta, Valencia City, Bukidnon ug Tawi-Tawi.

Sa ilang pag-apil sa liga, si Roxas Mayor Atty. Jan Hendrik I. Vallecer nagkanayon nga tuyo nila dili lamang ang paghatag og dungog sa ilang dapit pinaagi sa sports tourism, apan hasta sab paghatag og higayon sa mga magaduduwa sa ilang dapit nga makapakita sa ilang talento ug mailhan.

Gipasalig ni Vallecer nga bisan og wala sila kaayo'y mga bitoon nga magduduwa, apan lunod patay silang makigbugno sa ilang mga kontra sud sa korte.    

Mao sab ang panahom ni Vanguards head coach Eddie Laure, nga maoy MVP sa dihang gibihag sa Batangas Blades ang Negros Slashers aron paglugwa nga national champion niadtong 2001 MBA season. Sa mabulokon niyang karera isip pro, nakaduwa siya og 13 ka tuig sa PBA.   

Moabag ni Laure sa pagpadagan sa Vanguards mao ang Sugbuanon niyang assistant nga si coach Edsel Say Vallena.

Kanhi collegiate standout ug commercial veteran, si Vallena maoy head coach sa Cebu Institute of Technology-University (CIT-U) Wildcats sa wala pa mahunong ang aksiyon sa CESAFI tungod sa pandemiya.