Didal asam ang pang-8 Olympic slot

MANILA, Philippines — Pipilitin ni Asian Games at Southeast Asian Games gold medalist Margielyn Didal na maging pang-walong Olympic Games qualifier ng Pilipinas.

Dalawang qualifying tournaments ang lalahukan ni Didal para sa tsansang makamit ang silya sa 2021 Olympic sa Tokyo, Japan na nakatakda sa Hulyo 23 hanggang Agosto 8.

Sasabak ang 21-anyos na Cebuana skater sa Iowa Dew Tour sa Des Moines sa United States sa Mayo 7 hanggang 23 bukod pa sa paglahok sa ilang pocket tournaments sa California kasama si Olympic hopeful Kiko Francisco.

Magtutungo naman si Didal, ang 2019 SEA Games double-gold medalist, sa Rome, Italy para sumali sa Street World Championship 2021 sa Mayo 30 hanggang Hunyo 6.

Kung papasok ang 2018 Asian Games gold medal winner sa Top Three ng nasabing torneo ay pormal niyang maibubulsa ang Olympic berth.

Sakaling malasin naman siya ay kailangan niyang mapanatili o mapataas ang kanyang No. 14 world ranking dahil ang Top 20 skaters ang bibigyan ng Olympic slot.

Ang pitong Olympic qualifiers ng bansa ay sina weightlifter Hidilyn Diaz, gymnast Carlos Edriel Yulo, pole vaulter Ernest John Obiena at boxers Eumir Felix Marcial, Irish Magno, Nesthy Petecio at Carlo Paalam.

Kumpiyansa si Philippine Sports Commission (PSC) chairman William ‘Butch’ Ramirez na makakasama si Didal sa pitong Olympic qualifiers sa pagkampanya sa Tokyo Games.