Nets mibitik sa Pelicans

CEBU, Philippines — Talagsaong performance ang  gipakita nii Kyrie Irving diin miposte kini og 32 puntos uban ang usa ka lisud nga turnover jumper, driving lay-up ug upat ka free throws sa katapusang minuto aron aswaton ang Brooklyn Nets ngadto sa 134-129 nga kadaogan batok sa New Orleans Pelicans sa NBA kagahapon didto sa Smoothie King Center sa New Orleans, Louisiana.

Si Joe Harris miposa sab og duha ka free throws sa hinapos nga bahin sa duwa alang sa iyang 24 puntos sa Nets, kinsa nidaog bisan wala silang Kevin Durant ug James Harden.

Ang New Orleans gihatagan og higayon aron mohimo og usa ka 3-pointer sa nahabiling 4.8 segundos, apan  si Zion Williamson nakahimo og turnover hinungdan nga ang Pelicans nakatilaw sa ilang ikaupat ka sunod-sunod nga pilde.

Si  Williamson mitusik og 33  puntos, si Brandon Ingram miamot og  27  puntos alang sa Pelicans. Si Landry Shamet mitampo og 18 puntos ug walo ka assists alang sa Nets, samtang si Blake Griffin adunay 16 puntos ug walo ka rebounds.

Didto sa New York, si RJ Barrett mibugha og 18 sa iyang 24 puntos sa third period ug ang New York Knicks mipukan sa Charlotte Hornets, 107-97.

Ang opensa ni Barrett ug depensa sa Knicks nakapausab sa duwa human ang Hornet miiskor og 66 puntos sa first half. Ila lang gitugotan ang Hornets nga moiskor og 31 human sa halftime.

Sila si Derrick Rose ug Immanuel Quickley miiskor og 17 puntos matag usa alang sa Knicks nga mikatkat sa ikalima nga dapit sa Eastern Conference. Ang ikapitong sunod-sunod nga daog sa Knicks maoy ilang labing taas sukad niadtong 2013.