Free throw ni booker mipadaog sa bucks

CEBU, Philippines — Usa ra sa duha ka free throws ang napasud ni Devin Booker sa nahabiling 0.3 segundos sa duwa, apan igo na kaayo kini sa pagpadaog sa Phoenix Suns.

Miagi pa hinuon og overtime ang Suns una nila maangkon ang sikit nga kadaogan batok sa Milwaukee Bucks, 128-127 sa NBA kagahapon didto sa Fiserv Forum sa Milwaukee.

Human napatabla ni Khris Middleton ang iskor pinaagi sa iyang 3-pointer sa nahabiling 22.1 segundos, si Jae Crowder mihimo'g inbound pass ngadto ni Booker ug miitsa atubangan sa Phoenix bench sa wala pa motingog ang buzzer, apan si P.J. Tucker midutdot kaniya ug gitawgan og foul nga naghatod ni Booker ngadto sa free throw line.

Si Booker mipasud sa iyang unang free throw alang sa iyang 24 puntos sa maong duwa, apan nasipyat ang ikaduhang free throw.

Si Chris Paul mipupo og 22 puntos, 13 ka assists ug pito ka rebounds sa Suns.

Si Paul nakahipos na og 10,145 ka assists ug iyang na nga naapsan si Magic Johnson nga nihimo og 10,141 alang sa ikalima nga dapit sa kasaysayan sa NBA.

Sila si Mikal Bridges miamot og 21 puntos ug si De'Andre Ayton mitampo'g 20 puntos aron tabangan ang Suns nga mosidlak gikan sa nuybe puntos nga alkanse sa fourth quarter. Si Giannis Antetokounmpo mibangos og 33 puntos, si Middleton adunay 26 ug si Holiday mikolekta og 24 puntos alang sa Bucks nga napilde sa lima ka sunod-sunod nga home games.

Sikit kaayo ang duwa, gani 24 ka higayon nga nag-usab-usab ang labaw ug nagtabla sud sa 16 ka higayon.

Didto sa Philadelphia, si Stephen Curry mipasud og 10 ka 3-pointers ug miiskor og 49 puntos aron palapdan pa ang iyang ratsada ug ingon man pangulohan ang Golden State Warriors nga mibuntog sa Philadelphia Sixers, 107-96.

Ang usa ka tres ni Curry nga nagtabla sa duwa, 86-all naghatag kaniya sa ika-11 ka sunod-sunod nga mga duwa nga moiskor og dili momenos 30 puntos,

Ikalima sab kini ni Curry nga mikulit og 40 puntos sa duwa ning bulana ug nakig-uban nilang Kobe Bryant ug Michael Jordan nga adunay labing daghang 40 puntos nga nahimo sud lang sa usa ka bulan sa usa ka magduduwa nga nag-edad og 33-anyos pataas.

Si Joel Embiid mikulit og 28 puntos  ug milangkat og 13 ka rebounds alang sa napildeng 76ers, kinsa niduwa nga wala ang All-Star nga si Ben Simmons ug starting forward Tobias Harris.