Embiid hataw sa panalo ng 7ers

DALLAS, Philippines — Humakot si center Joel Embiid ng 36 points para pangunahan ang Philadelphia 76ers sa 113-95 paggupo sa Mavericks.

Gumamit ang 76ers (37-17) ng 10-1 atake sa pamumuno ni Embiid na nagbigay sa kanila ng 60-45 abante papasok ng third quarter para pabagsakin ang Mave-ricks (29-24).

Binanderahan ni Luka Doncic ang Dallas sa kanyang 32 points habang ipinahinga naman ang kanyang European sidekick na si  Kristaps Porzingis.

Inungusan ng Philadelphia para sa top spot ng Eastern Conference ang Brooklyn Nets (36-17) na nakansela ang pakikipagtuos sa Minnesota Timberwolves (14-40) matapos ang shooting incident sa isang Black man sa Minneapolis area.

Sa San Francisco, nilampasan ni Stephen Curry si NBA legend Wilt Chamberlain sa most points sa kanilang franchise history sa 116-107 pagdaig ng Golden State Warriors (26-28) sa Denver Nuggets (34-20).

Ang 21 points ni Curry sa first quarter ang nagbigay sa kanya ng career points na 17,786 para ungusan ang 17,783 ni Chamberlain sa Warriors franchise.

Sa Salt Lake City, winakasan ng Washington Wizards (20-33) ang franchise-record na 24-game home winning streak ng Utah Jazz (40-14) matapos kunin ang 125-121 panalo.

Sa New York, naglista si Julius Randle ng 34 points at 10 rebounds para igiya ang Knicks (28-27) sa 111-96 paggiba sa nagdedepensang Los Angeles Lakers (33-21).

Sa New Orleans, humataw si Brandon Ingram ng 34 points at may 30 markers si Zion Williamson para ihatid ang Pelicans (25-29) sa 117-110 panalo sa Sacramento Kings (22-32).