Espiritu, Barroga may patutunayan sa PVL
MANILA, Philippines — May gustong patunayan sina Satriani Espiritu at Gyra Ezra Barroga sa pagsabak ng BaliPure Water Defenders sa Philippine Volleyball League (PVL) Open Conference sa Abril.
“Kung ine-expect nila na underdogs kami, para sa amin challenge iyon to prove them wrong,” sabi ng opposite hitter na si Barroga kasama ang middle blocker na si Espiritu kahapon sa Tabloids Organization in Philippine Sports (TOPS) Usapang Sports on Air via Zoom online.
Gagawin ang PVL Open Conference sa Abril sa isang ‘bubble’ set-up sa Inspire Sports Academy sa Calamba, Laguna.
“Iyong mga challenges naman sa PVL helps me grow as an athlete,” wika ni Espiritu. “Kung may pressure man dahil sa mas mabibigat ang kalaban, leave that at the back of my head and beat other team.”
Kumpiyansa naman si BaliPure team manager Gil Cortez sa kakayahan ng kanyang mga bataan,
“Ang mga batang ito palaban. I know may mga pangalan ang ibang teams, laban lang kami kung laban, bilog ang bola,” ani Cortez. “Isa pa, ang advise namin sa kanila maging friendly sa media at take their advise kung kailangan para sa mas mahusay pa nilang laro.”
Isa rin sa mga magiging alas ng Water Defenders si Gracielle Bombita na nagsisilbi ngayong team captain.
“Matagal ko nang kinakausap si Grace. Kahit na lumipat siya sa iba, sabi ko open pa rin siya sa amin na bumalik,” dagdag ni BaliPure head coach Rommel Abella.
Ang itinuturing ni Abella na ‘team to beat’ sa torneo ang F2 Logistics at PetroGazz.
- Latest
