Team Ancajas pa-Connecticut na!

MANILA, Philippines — Lalarga na ang buong tropa ni International Boxing Federation (IBF) super flyweight Jerwin Ancajas patungong Uncasville, Connecticut para sumailalim sa quarantine protocols.

Sasagupain ni Ancajas si Mexican challenger Jonathan Rodriguez sa Sabado (Linggo sa Maynila) sa kanyang ikasiyam na title defense na idaraos sa Mohegan Sun Arena.

Mula Los Angeles, California, magtutungo ang Team  Ancajas sa Connec­ticut ng Martes (Miyerkules sa Maynila) kasama sina trainer/manager Joven Jimenez at MP Promotions president Sean Gibbons.

Sa Connecticut, daraan ang lahat ng miyembro ng Team Ancajas sa swab testing upang masiguro na negatibo ang lahat ng papasok sa bubble.

Habang naghihintay ng resulta, mananatili ang buong team sa kanilang hotel.

At sa oras na mag-ne­gatibo, maaari nang makalabas ng hotel ang grupo para makapag-ensayo.

Ayon pa kay Gibbons, mas maluwag ang health protocols ngayon kumpara noong nasa kasagsagan ng coronvirus disease (COVID-19) pandemic noong nakaraang taon.

Kailangan lamang na parehong negatibo sa swab test ang dalawang boksingero.

Sakaling may mag-positibo sa sinumang mi­yembro ng team gaya ng coach, trainer o sparring partner na kasama sa de­legasyon, paaalisin lamang ito sa bubble at dadalhin sa quarantine facility at tuloy pa rin ang laban.