Pusong Pinoy mas umiral kay Jaja
Naturalization sa Japan tinanggihan
MANILA, Philippines — Walang balak si Jaja Santiago na kagatin ang offer na maging Japanese citizen upang maging regular local player sa Japan V.League.
Isiniwalat ni Santiago na may offer ang kanyang Japanese club na Saitama Ageo Medics na gawin itong local player.
Magandang oportunidad ito para sa 6-foot-5 middle blocker dahil iba ang programa ng Japan sa volleyball.
Malakas din ang tsansa nitong makapaglaro sa Olympic Games bitbit ang Japanese flag.
Subalit nananatili ang pagiging pusong Pinoy ni Santiago kaya’t tinanggihan nito ang offer.
“Kalagitnaan pa lang ng liga, gusto na nila akong mag-stay. Gusto nilang palitan yung nationality ko actually. Gusto nila akong mag-stay pa dun at tulungan palitan yung nationality ko,” ani Santiago sa Volleyball DNA.
Aminado si Santiago na minsan lang dumating ang ganitong mga oportunidad.
Ngunit mas nanaisin nitong makapaglaro sa Olympic Games kasama ang mga kapwa Pilipino dala ang bandera ng Pilipinas.
“May dream akong makapaglaro sa Olympics pero siyempre may pride pa rin naman ako bilang Pilipino. Gusto kong tulungan yung bansa natin na dun sa goal ko na ‘yun, gusto ko kasama yung kapwa Pilipino ko,” ani Santiago.
Minsan na ring sumagi sa isipan nito ang mga posibilidad na tanggapin ang offer subalit sa ngayon, mananatili itong Pilipino.“Kung wala talagang chance, why not? Pero it’s on the back of my mind na puwede ako magpalit ng nationality,” aniya.
- Latest