Big fights next target ni Nietes
MANILA, Philippines — Nakasentro na ang atensiyon ni Donnie Nietes sa mas malalaking laban matapos ang kanyang impresibong comeback win.
Nasa palad na ni Nietes ang World Boxing Organization (WBO) International super flyweight belt na napagwagian kontra kay Galing Colombian pug Pablo Carrillo noong Linggo sa Dubai, United Arab Emirates.
Ngunit simula pa lamang ito ng pagbabalik ni Nietes.
Mas lalo itong naging uhaw na muling dalhin sa tuktok ng tagumpay ang kanyang pangalan.
At puntirya nitong makaharap ang ilang malalaking boksingero para maibalik ng husto ang kanyang ningning at patunayang may ibubuga pa ito.
Inihayag ni Nietes na may ilang offers na itong natanggap ngunit hindi muna nito isiniwalat kung sino ang posibleng makaharap sa kanyang susunod na laban.
Kabilang sa mga nabanggit na boksingero sina Chocolatito Roman Gonzalez, Juan Francisco Estrada at Sor Rungvisai.
“May mga offers akong natanggap kaya talagang bumalik ako (sa boxing),” ani Nietes.
Dating world champion si Gonzalez na hawak ang World Boxing Association (WBA) super flyweight title habang si Estrada ang kasalukuyang World Boxing Council (WBC) at WBA super flyweight king.
Sa kabilang banda, si Rungvisai ay dati ring world champion kung saan nahawakan nito ang WBC super flyweight noong 2019.
- Latest
