Sotto graduate na sa high school
MANILA, Philippines — Isa na namang tagumpay ang nakamit ni NBA prospect Kai Sotto matapos makuha ang kanyang high school diploma sa Miami School sa Hamilton, Ohio.
Inilabas ng kanyang ama na si dating PBA player Ervin sa kanyang social media account ang tagumpay ng 7-foot-5 Pinoy cager.
Sa larawan, nakasuot ng toga si Sotto hawak ang diploma na patunay na nakapagtapos na ito ng secondary education.
Kasama ni Sotto sa picture ang kanyang buong pamilya at ilang opisyal ng Miami School.
Magugunitang nilisan ni Sotto ang Ateneo de Manila University High School noong 2019 matapos ang kanyang 10th grade upang magtungo sa Amerika.
Sumailalim sa iba’t ibang training camp si Sotto sa Amerika para mas lalong mahasa ang kanyang basketball skills.
Sa gitna ng pukpukang ensayo, hindi kinalimutan ni Sotto ang kanyang edukasyon na isa sa pangunahing prayoridad nito.
Hindi natuloy ang pagsabak nito sa NBA G League kasama sana ang Ignite matapos bumalik ng Pilipinas noong Pebrero upang samahan ang Gilas Pilipinas sa training camp nito sa Inspire Sports Academy sa Calamba, Laguna.
Naghahanda ang Gilas Pilipinas sa FIBA Asia Cup Qualifiers na naudlot din at inilipat sa Hunyo.
- Latest
