Suns gipakaging ang Hawks

CEBU, Philippines — Si Devin Booker mipupo og 21 puntos ug si Dario Saric mipugas og 20 puntos sa Phoenix Suns, kansang kainit mipakaging sa Atlanta Hawks, 117-110 sa duwa nila sa NBA kagahapon didto sa Phoenix.

Ang Suns aduna na'y unom ka daog niaging pito ka mga duwa, samtang ang Hawks nakatilaw sa ikaupat sa lima ka duwa.

Mitampo og 19 puntos si Jae Crowder ug miposa og lima sa walo ka 3-pointers.

Naggukod ang Atlanta sa halos tibuok duwa hangtod si Trae Young mipasud og duha ka free throws aron pagtabnla sa iskor, 103-all sa nahabiling 3:31 sa duwa, apan wala madagit sa Hawks ang labaw.

Si Deandre Ayton' mihipos og 13 puntos ug 14 ka rebounds, samtang si Chris Paul  adunay 12 puntos ug walo ka assists sa Suns nga nagpabilin sa ikaduhang dapit sa Western Conference standing uban ang 32-14 record. 

Ang Hawks nga naglumlom sa ikaunom sa East  kitkit ang 23-24 nga baraha, gipangulohan ni Bogdan Bogdanovic nga mitusik og 22 puntos ug si Young miamot og 19 puntos ug 13 ka assists.

 Didto sa Washington, ang Terry Rozier miiskor og 27 puntos, samtang si Gordon Hayward adunay 26 puntos ug season-high 11 ka rebounds sa Charlotte Hornets nga mipukan sa Washington  Wizards sa iskor nga 114-104.

Ang Wizards niduwa nga wala ang NBA leading scorer nga si Bradley Beal sa ikaduhang sunod-sunod nga duwa tungod sa injury.

Natabla ni Rui Hachimura ang iyang career high30 puntos alang sa Wizards. Si Russell Westbrook  mihimo sa iyang ika-17 ka triple-double  karon nga season ug iyang ikatulo ka sunod-sunod human mirehistro og 22 puntos,15 ka rebounds ug 15 sab ka assists.   Sa Denver,  mikulit og 30 puntos si Jamal Murray aron pangulohan ang Denver Nuggets ngadto sa 104-95 nga kadaogan batok sa Philadelphia 76ers.