Team Philippines flag bearer sa Tokyo Olympics hindi pa napag-uusapan— Araneta
MANILA, Philippines — Hihintayin ng Philippine Olympic Committee (POC) ang anunsyo ng International Olympic Committee (IOC) para sa detalye ng opening ceremonies ng 2021 Olympic Games sa Tokyo, Japan.
“At the moment hindi natin alam kung meron pa bang magpa-parade dahil walang spectators,” ani Team Philippines Chef De Mission Mariano ‘Nonong’ Araneta ng football. “I don’t know what will happen. Very fluid pa eh. Hindi natin alam ang mangyayari sa opening.”
Ang naging flag bearer ng Team Philippines noong 2016 Olympics sa Rio de Janeiro, Brazil ay si taekwondo jin Kirstie Alora at ang yumaong si table tennis player Ian Lariba.
Ipinagbawal ng IOC ang mga international spectators sa 2021 Tokyo Olympics, nakatakda sa Hulyo 23 hanggang Agosto 8, dahil sa coronavirus disease (COVID-19) pandemic.
Ayon kay Araneta, mas mabuting sundin ng mga Olympic member countries ang naturang direktiba ng IOC.
Samantala, negatibo ang resulta ng swab test ni 2016 Olympic Games silver medalist Hidilyn Diaz para sa coronavirus disease (COVID-19).
Ipinakita ito ng national lady weightlifter sa kanyang Instagram post.
“First time to do covid-19 swab test,” ang caption ng 2019 Southeast Asian Games gold medal winner na kasalukuyang nasa kanyang training camp sa Malacca, Malaysia.
Lalahok ang 30-anyos na si Diaz sa Asian Weightlifting Championships sa Uzbekistan sa Abril 16 hanggang 25 na pinakahuling qualifying tournament para sa Tokyo Olympics.
Kailangan lamang ng tubong Zamboanga City na sumali sa pang-anim niyang Olympic qualifying tournament para opisyal na makuha ang Olympic berth.
- Latest
