Bulahan si Caitom: Kanhi kampiyon mitukod iyang kaugalingong boxing gym
CEBU, Philippines — Bulahan si kanhi WBC Asia Boxing Council minimumweight title-holder Rey Caitom Jr. kay nakab-ot niya ang laing pangandoy pagtukod ug pagdumala sa iyang kaugalingong boxing and fitness gym nga pormal gibuksan kagahapon.
Ang labing bag-ong sweat shop sa lungsod nahimutang kilid sa balay ni Caitom sa Barangay Babag 2, Dakbayan sa Lapu-Lapu.
Aduna kini duha ka andana, ang una alang sa weight ug fitness activities ug ang ikaduha didto gipahimutang ang boxing ring.
“This is it. Finally, naa na gyud ni. Natukod na gyud. Maayo na lang ba naa tay laing makita sa atoang hinagoan,” paambit pa ni Caitom.
Sayod si Caitom nga pipila lamang ka mga boksidor dinhi sa nasud ang nibubo og puhonan sa ilang linimbasugan nga kuwarta.
Bisan pa, giklaro ni Caitom nga wala niya gitukod ang gym aron makasapi, kondili paglaum nga mohulma'g kampiyon ugma damlag.
Sukad nibalhin si Caitom sa iyang bag-ong puloy-anan,nipasiugda siya og libreng training ngadto sa mga kabus nga mga bata sa ilang silingan isip iyang paagi aron makabawos ngadto sa paugnat sa kusog nga nakatabang paghimo kaniya kon unsa siya karon.
Bisan duna na siya'y kaugalingon nga gym karon, si Caitom padayon gihapon nga mohimo og "one-on-one" sessions ngadto sa tawo nga dili gusto mobiya sa ilang balay ug mohimo sab siya og online training sa iyang mga suki sa gawas sa nasud.
Nagplano sab si Caitom nga mosulod sa kalibotan sa boxing promotion sa umaabot kon wala na'y angay'ng kabalak-an ug mawala na ang pandemiya.
“Kung kaloy-an, ma-establish nako diri unya ma-okay na ang tanan wala na'y pandemic, mag-promoter pud ko.
Boxing never stops. I may be done with fighting, but definitely I will be in boxing forever," panapos ni Caitom.
- Latest