MJAS angay saludohan

Gawas sa mga hulga ug restriksiyon taliwala ning pandemiya, duna pa'y usa ka dakong kakulian nga naagian ang MJAS Zenith-Talisay City Aquastars sa ilang dalan padung ngadto sa ilang partisipasyon sa labing unang Pilipinas Vismin Super Cup nga magsugod na sunod bulan.

Kini mao nga kon makabalik pa ba sila og duwa sa MPBL inig ka human nila og salmot sa Super Cup, ang labing bag-ong propesyonal nga liga sa basketbol sa nasud. Sagad sa mga magduduwa sa MJAS-Talisay nga moasdang sa Super Cup naglangkob sab sa Valenzuela City team nga sakop sa MPBL.

Dinhi na miulbo ang isyu. Ang MPBL amateur, samtang ang Super Cup usa ka pro league. Mao kini ang hinungdan nganong ang kadagkoan sa MPBL sa sayo pa nagparamdam nga lagmit dili na nila dawaton og balik sa ilang poder ang MJAS-Valenzuela kon ugaling moapil kini sa Super Cup.

Bisan pa man niini, ang MJAS mipadayon gyud sa ilang pagrepresenta sa Talisay Aquastars sa Super Cup nga mosikad karong Abril 9 didto sa lungsod sa Alcantara habagatang bahin sa Sugou.

Sa dihang atong naka-estorya sa miaging semana, si MJAS-Talisay team manager Jhon Santos mipadayag nga ila kining gibuhat sa bugtong tinguha nga mahatagan og kapanginabuhian ang mga players ning panahon sa kalisdanan. Matud pa ni Santos nga lisud ang kahimtang sa mga players kon walay liga mao nang ilang gipahimuslan ang kahigayonan nga makatabang kanila pinaagi sa Super Cup.

Gipasabot hinuon ni Santos nga nananghid sila og tarong ug ilang gipasabot ang ilang kawsa sa ilang pag-entra sa Super Cup ngadto sa mga opisyales sa MPBL. Iyang giklaro nga misalmot man tuod sila sa Super, apan magpabilin gihapon sila sa MPBL.

Nindot ug dalaygon kaayo ang maong lakang sa MJAS. Imbes nga maalarma kay tingali'g isalikway unya sa MPBL, ilang gipasulabi sa ilang galamhan ug dughan mao ang pagtunol og kamot nga matinabangon ngadto sa mga nanginahanglan ning punto sa krisis. Ngadto sa MJAS-Talisay management, saludo ko. Bulahan ug makapadasig sa mga players ang inyong kaayo.