Davao Occidental Tigers mitangag sa MPBL Lakan Cup title

CEBU, Philippines — Luha sa kalipay ang nidagayday sa mga magduduwa sa Davao Occidental Tigers human gikoronahan isip bag-ong hari sa Maharlika Pilipinas Basketball League (MPBL).

Si Mark Yee mipusgay og usa ka go-ahead three-pointer sa nahabiling 13.4 segundos sa overtime aron luwason ang Tigers gikan sa kulbahinam nga duwa batok sa San Juan Knights, 89-88 sa Game-4 sa "best-of-five" series sa MPBL Chooks-to-Go Lakan Cup niadtong Domingo didto sa Subic Bay Metropolitan Authority (SBMA) gymnasium sa Subic, Zambales.

Namawi si Yee human masipyat ang iyang  tres sa regulasyon nga nakapuwersa sa duwa ngadto sa overtime, 80-all.

Gawas nga ilang gipalagpot sa trono,  maisip sab kini nga bawos sa Tigers sa ilang kapildihan ngadto sa Knights sa 2019 Datu Cup championship series.

Si Yee miiskor og 19 puntos, apan walay makalabaw sa krusyal nga tres nga iyang gibuhian sa himalatyong segundos nga mipasarasay sa Knights, kansang duwa nagkagidlay dihang wala na moduwa si Mike Ayonayon tungod sa hamstring injury ug limitado na sab ang oras ni Larry Rodriguez  human makabaton og lima ka fouls.

Milangkat sab si Yee og 12 ka rebounds ug tulo ka blocks hinungdan nga siya ang napiling Finals MVP ug "Defensive Player of the Year".  

Apan ang guwardiya sa Tigers nga si Emman Calo maoy nakahatag og dakong impak sa Game-4 human miiskor og game-high 22 puntos, lakip ang iyang krusyal nga 3-pointer sa nahabiling 2:11 sa overtime nga nakapatabla sa duwa, 86-all.

Ang ex-pro nga si Larry Rodriguez maoy nangu sa Knights, samtang si Jhonard Clarito mitampo og 18 puntos ug ang Season MVP nga si John Wilson miamot og 13 puntos.