College rivals excited na makaharap ni Maraño
MANILA, Philippines — Excited na si F2 Logistics middle blocker na makaharap ang mga players na nami-miss nitong makalaban noong nasa college days pa ito.
Ngayong nasa Premier Volleyball League (PVL) na ang Cargo Movers, matutupad na ang kahilingang ito ni Maraño.
Partikular na tinukoy ni Maraño ang ilang Ateneo de Manila University players gaya ni Creamline Cool Smashers team captain Alyssa Valdez na nakasabayan nito sa UAAP.
“Nakaka-miss talagang makalaban sila Alyssa and ‘yung other players na nasa PVL. Kasi dati sa Philippine Superliga kami, so ngayon makakasama na namin ulit sila sa isang tournament,” ani Maraño na dating team captain ng La Salle.
Itinuturing na pinakamainit na magkaribal sa collegiate league ang Ateneo at La Salle hindi lamang sa basketball maging sa volleyball.
At naging bahagi na sina Maraño at Valdez sa rivalry na ito noong nasa college pa ang dalawang mahusay na players.
Kaya naman muling magkikita-kita ang mga UAAP players sa PVL na tunay na inaabangan ng lahat.
“Sobrang excited na ako dahil sama-sama kami sa isang liga. Mas lalong tumataas at umaangat ‘yung level of volleyball performance talaga,” ani Maraño.
Maliban sa magiging magandang takbo ng liga, magandang pagkakataon din ito para tuluyang magkaisa ang volleyball sa bansa.
Inaabangan na rin ang pagbabalik ni Filipino-American Kalei Mau na nagkumpirma na ng paglahok sa Open Conference.
Kaliwa’t kanan na ang poster ng Valdez vs. Mau sa social media na mas lalong nagpapatindi ng excitement ng mga volleyball fans.
Bakit nga naman hindi, e mahigit isang taon nang walang napapanood na umaatikabong aksyon ang mga fans matapos matigil ang mga tournaments dahil sa pandemya.
- Latest
