Orcollo kampeon sa Banks Ring sa Ohio

MANILA, Philippines — Muling umariba si dating world champion Dennis Orcollo matapos magkampeon sa 2021 Midwest Open Billiards Championship - Banks Ring Game na ginanap sa Michael’s Billiards sa Fairfield sa Ohio, USA.

Pinataob ng Pinoy cue master sa finals si American Mike Leek upang maibulsa ang tumataginting na $8,000 premyo o halos P400,000.

Nagkasya naman sa $3,000 konsolasyon si Leek habang pumangatlo si American Billy Thorpe para sa $1,000 premyo.

Ito ang ikatlong korona ni Orcollo sa taong ito matapos pagharian ang 10-Ball at One Pocket events sa Michael Montgomery Memorial Championship noong nakaraang buwan.

Samantala, sa Banks Main Event pasok na sa finals si Zoren James Aranas matapos dumaan sa pukpukang bakbakan sa losers’ column.

Isa-isang tinalo ni Aranas sina Roberto Gomez sa first round, Payne McBride sa second round, Jeremy Siye sa third round, John Brumback sa fourth round, Dee Adkins sa fifth round, John Henessee sa quarterfinals bago matalo kay Billy Thorpe sa semifinals ng winners’ bracket.