Wizards nakaipsot, gipilde ang Clippers
CEBU, Philippines — Gipilde sa Washington Wizards ang usa sa mga lig-ong koponan nga Los Angeles Clippers human maka-eskapo bitbit ang 119-117 nga kadaogan sa nagpadayong aksiyon sa NBA kagahapon didto sa Washington.
Gipangulohan ang daog ni Bradley Beal nga mikabkab og 33 puntos, samtang si Russell Westbrook miambit og 27 puntos, 11 ka assists ug siyam ka rebounds ug si Moe Wagner miamot og 12 puntos sa Wizards, kansang duha ka sunod-sunod nga pilde napakgang. Ang Wizards nidaog og walo sa 11 ka duwa sa dili pa ang All-Star break. Si Beal, ang All-Star ug leading scorer sa NBA mipasud lang og siyam sa 23 ka tira gikan sa field, apan misipyat lang og usa ka 15 niya ka free throws.
Ang star sa Clippers nga si Kawhi Leonard miiskor og 22 puntos, si Patrick Beverley adunay 17 puntos ug si Ivica Zubac miabuno'g 13 puntos ug 13 sab ka rebounds. Ang Clippers adunay unom ka pilde sa siyam ka mga duwa sa dili pa ang All-Star break. Apan bisan pa niini, ang Clippers nagpabiling gihapon nga nag-una sa Western Conference standing.
- Latest
