MJAS Zenith-Talisay Aquastars line-up hitsas na

CEBU, Philippines — Nakompleto na ang lista sa ngalan sa mga magduduwa sa MJAS Zenith-Talisay City Aquastars nga mokumbati sa Pilipinas VisMin Super Cup nga gikatakdang sugdan karong Abril 9 didto sa lungsod sa Alcantara.

Dihang ilang gikuha ang serbisyo sa duha ka kanhi PBA players nga silang Lester Alvarez ug Jan Niccolo Jamon ug ingon man si ex-MPBL player Dave Moralde.

Ang Talisay Aquastars nga gibitoonan og mga tang-ang kanhi PBA ug kanhi MPBL players, pangulohan sa team captain niini nga si two-time PBA champion Paolo Hubalde ug multi-titled forward Val Acuña.

Ikauban nila mao silang Patrick Jan Cabahug, Kevin Villafranca, Tristan Albina, Shane Menina, Joshua dela Cerna, Lugie Cuyos, Jaymar Gimpayan, Mel Francis Mabigat, Allan Dominic Santos, Lord Casajeros, Egie Boy Mojica, Steven Cudal ug Jhaymo Eguilos nga maoy mokompleto sa line-up sa MJAS Zenith-Talisay City Aquastars

Gawas sa Talisay Aquastars, lain pang mga koponan nga mopakita'g aksiyon sa Visayas leg mao ang Xur Homex Realty-Eastern Samar, KCS-Mandue City Eagles ug ARQ Builders-Lapu-Lapu City Heroes.