Abanse Negrense naghari sa PSL beach volley
CEBU, Philippines — Ang Abanse Negrense A nga gibitoonan nilang Alexa Polidario ug Erjane Magdato mipukan sa Sta. Lucia A nilang DM Demontano ug Jacke Estoquia, 21-15, 21-17 aron maghari sa 2021 Gatorade-Philippine SuperLiga Beach Volleyball Challenge Cup niadtong Domingo didto sa sand courts sa Subic Bay Metropolitan Authority (SBMA).
Giharos nilang Polidario ug Magdato ang ilang unom ka mga duwa sa tulo ka adlaw nga kompetisyon. Ang Abanse Negrense A nidaog sa tulo mga duwa sa group play, dayon ilang gipilde ang Toby's Sports ug ang Sta. Lucia B sa wala pa langkata ang korona batok sa Sta. Lucia A.
Kini ang ikatulong sunod-sunod nga Challenge Cup diin sila si Demontano ug Estoquia nahimong runner-up.
Sa laing bahin, ang pares nilang Jennifer Cosas ug Gelimae Villanueva sa Abanse Negrense B mipukan nilang Bang Pineda ug Jonah Sabete sa Sta. Lucia B sa iskor nga 21-13, 22-20 aron pagpahiluna sa ikatulong dapit.
- Latest
