Didal kampante sa kanyang tsansa sa Tokyo Olympics
MANILA, Philippines — Kasalukuyang nakapuwesto si national skater Margielyn Didal sa No. 14 sa world street skate rankings.
Kung ang sinasabing kukuning top 20 skaters ang pagbabasehan ay pasok na ang 2018 Asian Games at 2019 Southeast Asian Games gold medalists sa 2021 Olympic Games sa Tokyo, Japan.
“Kampante naman ako kung nasa anong numero ako ngayon sa world rankings but also like if I could make it better it would be good,” wika ni Didal kahapon sa Philippine Sports Comission (PSC) Hour mula sa Cebu City. “But I’m good sa number ko naman.”
Nagsasanay ang 21-anyos na si Didal sa isang training camp sa Cebu City kasama sina 2019 SEA Games silver medalist Mark Feliciano at Cindy Lou Serna sa ilalim ni national head coach Danny Bautista.
Kinansela ng World Skate, ang international skateboarding at roller sports body, ang Olympic Games qualifying tournament sa Peru sa Marso dahil sa coronavirus disease (COVID-19) pandemic.
Maaari sanang maging opisyal ang pagsikwat ni Didal sa tiket para sa 2021 Tokyo Olympics sa Hulyo kung natuloy ang nasabing torneo.
“Sobrang sad kasi hindi ako makapag-skate, hindi ako makapag-compete,” wika ng lady skater. “But I’m also trying to be safe din with this pandemic. I’m trying to stay in my home town and spending time with my family.”
- Latest
