PSL andam na sa pagbalik sa beach volley tournament

CEBU, Philippines — Andam na ang Philippine SuperLiga (PSL) sa pagbalik sa aksiyon pinaagi sa 2021 Gatorade-Beach Volleyball Challenge Cup nga sugdan karong Biyernes didto sa Subic Bay Metropolitan Authority (SBMA) sand courts.

Walo ka mga koponan, apil na ang guest team Kennedy Solar Energy-PetroGazz ang magtigi  sa maong kompetisyon.

Lain pang mopakita'g aksiyon mao ang Sta. Lucia, F2 Logistics, United Auctioneers Inc. Abanse Negrense ug ang Toby's Sports.

Ang Sta. Lucia mopadala og duha ka entries diin magpares ang mga beterano nga silang Bang Pineda ug Jonah Sabete,  ingon man silang DM Demontano ug Jackie Estoquia.

Morepresentar sa F2 Logistics mao silang Jenny Mar Senares ug Kyla Angela Gallego, samtang ang United Auctioneers Inc. moparada nilang Ella Viray ug Theresa Ramas.

Mopadala sab og duha ka teams ang Abanse Negrense diin mag-uban sila si Alexa Polidario ug Erjan Magdato ug si Jennifer Cosas mopares ni Gelimae Villanueva.

Ang Toby's Sports bitoonan nilang  Jonah San Pedro ug Javen Sabas.

Moduwa alang sa guest team Kennedy Solar Energy-PetroGazz mao silang Ariane Luna Alarcon ug Christina Canares.

“We want to thank the teams, especially our guest team PetroGazz, for helping us restart our beach volleyball tournament using a bubble setup,” matud pa ni PSL chairman Philip Ella Juico.

“We also want to thank the IATF Region 3 and the SBMA for supporting us and making sure that our delegates, especially the athletes, will be safe from contracting coronavirus disease.”

Ang tanang teams ikuwarantin sa SBMA ug kuhaan og swab test sa dili pa ang kompetisyon.