Ramirez pinapauna ang mga frontliners para sa bakuna
MANILA, Philippines — Nakakuha ng suporta ang Philippine Sports Commission (PSC) mula sa House Sports and Youth Development Committee para maisama ang mga national athletes sa priority list na bibigyan ng gobyerno ng coronavirus disease (COVID-19) vaccines.
Ngunit sinabi ni PSC chairman William ‘Butch’ Ramirez na mas dapat pa ring maunang tumanggap ng COVID-19 vaccines ang mga frontliners.
“We are requesting support from the IATF (Inter-Agency Task Force) for the much needed COVID-19 vaccines but without skipping the most vulnerable frontliners,” ani Ramirez sa komite.
Inaprubahan ng House Sports and Youth Development Committee ang isang resolusyon na humihiling sa pamahalaan na maisama sa priority list ang mga atletang lalahok sa 2021 Olympic Games at sa 31st Southeast Asian Games.
Ang nasabing resolusyon ay dadalhin sa plenary kung saan maaari itong tanggapin o ibasura ng Kongreso, ayon kina House Deputy Speaker Mikee Romero (1-PACMAN party-list) at panel chairman Rep. Faustino Michael Carlos Dy (Isabela).
- Latest