Saludar misakmit sa WBA title

CEBU, Philippines — Nakampiyon na sab si Vic 'Vicious' Saludar human miiskor og 'split decision' nga kadaogan batok sa kababayan niining si Robert 'Inggo' Paradero aron pagsakmit sa bakanteng World Boxing Association (WBA) world minimumweight title kagahapon didto sa Biñan football stadium sa Laguna.

Si Paradero, lumad gikan sa Valencia City sa Bukidnon, nailhan sa kusog niining kinumo timaan sa 12 ka buok niyang gipatikangkang sa perpekto niyang 18-0 record, samtang ang pambato sa Polomolok, South Cotabato nga si Saludar, kanhi WBO 105-pound champion, nagbitbit og 20-4 nga baraha uban ang 11KOs.

Mao kadto ang kontrobersiyal nga 'split decision' nga daog pambato sa Polomolok, South Cotabato nga si Saludar kay si Paradero nga lumad gikan sa Valencia City sa Bukidnon nagtuo nga siya ang midaog.

Si judge Aquil Tamano miiskor og 115-113, samtang ang lawyer-judge nga si Danrex Tapdasan mihatag og 116-112 kang Saludar. Sa iyang bahin, si judge Alfie Jocosol mihatag ni Paradero og 118-110.

Nagpaniid pa si Saludar sa lihok sa mas agresibo nga si Paradero pagsugod sa away. Apan si Saludar mao na sab ang agresibo sa pakigbatok ni Paradero hangtod nahuman ang 12 ka hugna nga binukbukay.

Si Saludar, ang kanhi nagkupot sa WBO world minimumweight title mipalambo sa iyang rekord ngadto sa 21-4  uban ang 11 ka knockouts, samtang si Paradero nakatilaw sa iyang unang pilde ug midailos ngadto sa 18-1, 12KOs.     

Si Saludar mao sab ang reigning Asia Boxing Federation minimuweight champion.

Sa supporting main event, ang walay pildeng si Carl Jammes Martin sa Ifugao miiskor og 5th round knockout batok ni Joe Tejones sa ilang super bantamweight fight.