Sinukmagay na!

Paradero, Saludar mag-ilog sa WBA minimumweight title

CEBU, Philippines — Human nasibog pipila ka higayon, miabot na ang takna sa paghukom alang sa wa'y pildeng si Robert 'Inggo' Paradero ug sa kababayan niini si Vic 'Vicous' Saludar gumikan kay mag-abot sila  alang sa bakanteng WBA minimumweight title karong adlawa didto sa Biñan football stadium sa Laguna.

Si Paradero, lumad gikan sa Valencia City sa Bukidnon, nailhan sa kusog niining kinumo timaan sa 12 ka buok niyang gipatikangkang sa perpekto niyang 18-0 record, samtang ang pambato sa Polomolok, South Cotabato nga si Saludar, kanhi WBO 105-pound champion, nagbitbit og 20-4 nga baraha uban ang 11KOs.

Ang duha parehong wala makaaway sa miaging tuig tungod sa pandemiya nga nakaangkla sa tanang mga kalihukan sa paugnat sa kusog sa tibuok kalibotan.

Ang 24-anyos nga si Paradero katapusang mipakita og aksiyon niadtong Abril 5, 2019 sa dihang iyang gipakamang si Jonathan Almacen sud lamang sa usa ka hugna atubangan sa iyang mga katagilungsod didto sa Malaybalay, Bukidnon.

Samtang si Saludar wala sab makasalida sukad iyang gipalukapa si Mike Kinaadman sa ikaunom nga hugna aron birahon ang Asian Boxing Federation minimumweight belt niadtong Disyembre 21, 2019 didto sa Enan Chiong Activity Center sa Dakbayan sa Naga, Cebu.

Ang sangka nilang Saludar ug Paradero maoy ikalimang world title fight diin nag-unay ang mga Pinoy'ng boksidor sa kasaysayan. Ang una nahitabo dul-an usa ka siglo na ang milabay sa dihang si Pancho Villa midepensa sa iyang world flyweight title batok ni Clever Sencio didto sa Wallace Field nga mao na karon ang Luneta Park didto sa Manila niadto pang 1925.