Hawks midagit sa Celtics

Giputol ilang upat ka sunod-sunod nga pilde

CEBU, Philippines — Giputol sa Atlanta Hawks sa pagpangulo ni Trae Young ang ilang upat ka sunod-sunod nga pilde pinaagi sa pagdagit sa Boston Celtics, 122-114 sa nagpadayong duwa sa NBA kagahapon didto sa TD Garden sa Boston, Massachusetts.

Si Young mipaksit og 40 puntos uban ang walo ka assists, si Clint Capela mihipos og 24 puntos ug 12 ka rebounds alang sa Hawks nga miiskor sa ilang unang daog batok sa Celtics sukad niadtong Abril 8, 2018.  Si John Collins mitampo og 20 puntos ug unom ka rebounds sa maong kadaogan.

Ang Hawks nga mitira og season-high 57 percent gikan sa field, milansang og 90-81 nga bentaha paingon sa fourth quarter.

Mi-rally ang Celtics aron mapahakan ang labaw ngadto na lang sa tres puntos, 94-91, apan mitubag ang Hawks pinaagi sa 8-2 run aron inaton og balik ang labaw, 102-93 sa nahabiling 6:33 sa duwa.

Anugon kaayo ang 35 puntos ni Jayson Tatum kay ang Celtics aduna na'y lima ka pilde sa pito ka duwa.

Didto sa Orlando, si Terrence Ross miiskor og 18 sa iyang season-high 30 puntos sa second half  ug ang Magic mipahimulos sa ilang mainitong rally sa third period aron paglubong sa New York Knicks, 107-89.

Ang Magic milusad og 25-8 run sa katapusang nuybe minutos sa third period ug ilang na-outscored ang Knicks, 30-14 sa maong kuwarter aron mapapas ang tres puntos nilang alkansi.

Si Ross mitusak og 10 sa 16 ka itsa gikan sa field ug miposa og lima sa unom ka 3-pointers.

Sa Philadelphia, si Joel Embiid diriyot miposte og triple-double human mikadlit og 31 puntos, 11 ka rebounds ug siyam ka assists aron pangulohan ang Sixers nga mipahagsa sa Houston Rockets, 118-113.

Si Seth Curry miamot og 25 puntos, samtang si Tobias Harris mitampo'g  24 alang sa Eastern Conference-leading 76ers, kinsa mipakgang sa ilang tulo ka sunod-sunod nga pilde.

Mitimon sa Rockets si John Wall pinaagi sa iyang 28 puntos. Niduwa ang Rockets nga wala silang P.J. Tucker, Christian Wood ug Victor Oladipo.