Butler nangu sa Heat pagpakaging sa Knicks

CEBU, Philippines — Gihuman ni Jimmy Butler ang duwa uban ang 26 puntos, 10 ka assists ug walo ka rebounds aron pangulohan ang Miami Heat ngadto sa 98-96  nga kadaogan batok sa New York Knicks  kagahapon sa National Basketball Association didto sa Miami.

Ang Knicks labaw og 12 puntos sa second quarter ug otso puntos sa sayong bahin sa final period, apan pakyas sila pagkontrolar sa ilang labaw hangtod nahuman ang duwa.

Bugnaw kaayo si Bam Adebayo pagsugod sa duwa ug mihipos lamang og 19 puntos ug unom ka rebounds. Mipasud siya og 13 sa 16 gikan sa free throw line, apan tulo lang sa siyam ka itsa iyang napasud gikan sa field goals.

Ang forward sa Heat nga si Kelly Olynyk miiskor og 17 sa iyang 20 puntos sa first half ug si Tyler Herro adunay 15 puntos ug pito ka rebounds.  Si Herro maoy nakatabla sa iskor, 88-all sa nahibiling 5:02 sa fourth quarter ug ang iyang 3-pointer nihatag sa Heat og 97-94 nga labaw sa katapusang 1:04 sa duwa.

Si Elfrid Payton maoy nangu sa Knicks uban ang 18 puntos, samtang si RJ Barrett mihipos og 13 puntos. Si Barrett aduna unta'y higayon nga motabla sa duwa sa katapusang posisyon, apan wala masulod ang iyang lay-up dayong kapupos sa oras.

Si Derrick Rose miiskor og 14 puntos sa iyang unang duwa sa pagbalik niya sa New York. Mitampo si Julius Randle og 12 puntos ug si Alec Burks miamot og 11 puntos sa Knicks.