Slaughter nibalik sa Ginebra, nipirma lab-as nga kontrata

CEBU, Philippines — Opisyal na. Si Greg Slaughter mobalik sa Barangay Ginebra human nipirma og usa ka lab-as nga kontrata.

Mismo si coach Tim Cone ang nikompirmar sa maong balita ngadto sa Philippine Star niadtong Huwebes, nga ang 7-foot slotman nibalik sa Ginebra human sa dul-an usa ka tuig nga "indifinite break" niadtong Pebrero 2020 nga niadtong tuiga mao sa'y pagpupos sa iyang kontrata sa Ginebra.

"No answers yet, except that Greg is signed," tubag ni two-time grandslam coach sa pipila ka mga pangutana mahitungod sa mga plano sa Gin Kings sa umaabot nga 2021 Philippine Cup nga gikatakdang sugdan sa Abril 9. Wala hinuon gisulti sa Ginebra management ang mga termino sa kasabotan.

Ang four-time PBA champion ug kanhi Best Player of the Conference (BPC) makig-uban og usab sa Ginebra, nga bag-o lang nihaw-as gikan sa makasaysayanon nga Philippine Cup title sa PBA bubble didto sa Clark, Pampanga sa miaging tuig.

Si Slaughter makig-uban sa Gins Kings pinangulohan  ni reigning All-Filipino best player of the conference Stanley Pringle, LA Tenorio, Japeth Aguilar ug Scottie Thompson sa 46th Season sa PBA.

Siya sab ang instrumento sa upat ka kampiyonato sa Ginebra gikan niadtong 2016 hangtod sa 2019.