Blackwater milab-as sab sa kontrata ni Cruz

CEBU, Philippines — Gihigtan ug pabiling moduwa si Carl Bryan Cruz sa Blackwater Elite sa umaabot nga PBA 46th Season nga gikatakdang sugdan karong Abril 9 didto sa Clark bubble sa Pampanga.

Si Cruz gipapirma og bag-ong kontrata sa Blackwater human ang Elite ug ang Meralco Bolts nagkauyon nga magbinayloay og player niadtong Martes.

Ang Blackwater nihatag ni kanhi PBA top overall pick Mac Belo ngadto sa Meralco bugti ni Baser Amer sa 'one-on-one' trade.

Naduso na ang trade proposal sa trade committee, apan magpaabot pa kini sa final approval gikan sa Commissioner's Office.

Usa ka tuig ra hinuon ang gihatag nga lugway sa kontrata ni Cruz.

Si Cruz ang ikaduhang player nga nipirma og kontrata sa koponan sa miaging tulo ka adlaw human lugwayi ang kontrata ni Ron Denison niadtong Lunes.

Si Cruz nagpaalim sa injury sa iyang tuhod sa miaging season nga nakapugong kaniya pagduwa sa Blackwater atol sa Philippine Cup bubble.

Gikuha siya sa Blackwater niadtong 2019 trade ilis ni Alaska Aces rookie Abu Tratter.