Iro guwardiya sa Heat batok COVID-19

Dunay panultihon nga nag-ingon nga "a dog is a man's best friend." Tinuod kaayo ni. Testamento niini, daghan na kita'g nabatian nga mga makatandog sa dughan nga estorya kabahin sa pagkamabayanihon sa mga iro nga matinud-anon kaayo sa ilang agalon ug andam mosugal sa ilang kinabuhi aron lamang pagsalbar ni bisan kinsa nga nanginahanglan og tabang ug anaa sa peligrosong kahimtang.

Sa lintunganay nga pagka sulti, ang iro makamao mosukli sa pagpangga nga atoang ibubo kanila.

Dili ikalimod nga kining maong klase sa hayop dako og tabang dili lamang sa atong kinabuhi apan hasta sab sa  atong katilingban. Una sa tanan, ang mga iro katumpang nato sa atong seguridad ug kaluwasan. Kon duna kay iro, dili lamang kini makalingaw kanimo kay duna kay hagwaon, apan makapakgang kini sa mga dautang elemento nga mangahas paghimo og dili maayo sa imong panimalay kay mopaghot man kini niadtong tawo nga estranghero sa iyang panan-aw. Sa natad sa pagpatuman sa balaod, duna pa'y mas bug-at nga papel nga gihuptan ang mga iro. Gumikan sa hait nilang utok ug talagsaong abilidad nga makapanimaho, gigamit sila mga otoridad pag-detect og mga bomba, droga ug uban pang mga kontrabando nga sagad isuway og palusot sa mga sindikato. Dako gyud ang ilang tabang pagsanta sa nagkadaiyang mga krimen sa tibuok sa kalibotan.

Og kon dunay sa kalamidad o katalagman, gamit sab ang mga iro ilabi na sa search and rescue operation.   

Ning panahon sa pandemiya, nadunganan pa ang responsibilidad sa mga iro nga haum ug mahinungdanon kaayo sa kasamtangang sitwasyon. Unang mipahimus sa ilang serbisyo ang Miami Heat sa NBA. Sa tinguha nga makapasud og balik sa pipila nila ka fans, ang Heat mogamit og mga iro nga dunay kapasidad nga mapanimaho sa coronavirus aron pag-screen sa ilang fans nga gustong motan-aw sa ilang mga duwa didto sa American Airlines Arena.

Inig abot sa mga fans sa higayon nga dunay home game ang Heat, dad-on sila sa usa ka screening area diin ang 'coronavirus-sniffing dogs' palabyon kanila. Kon dili gani mokisaw ang iro ug molahos ra og lakaw, mahimo nang makasulod ang usa ka fan sa binyu.  Apan kon ugaling molingkod ang iro, senyales kini nga ang iro nakapanimaho sa virus ug ang maong fan dili pasudlon. Tungod niini, matawag nato nga frontliners na sab ang mga iro mao nang angayan natong amumahon ug panggaon ang ilang lahi kay ato silang kasangga sa daghang aspeto sa atong kinabuhi.