Durant, Irving nagmangtas
CEBU, Philippines — Nagmangtas sila si Kevin Durant ug Kyrie Irving sa fourth aron tabangan ang Brooklyn Nets nga mosapyaw og daog batok sa Miami Heat, 128-124 sa duwa nila sa NBA kagahapon didto sa Barclay's Center sa New York.
Si Durant mikadlit og 31 puntos, samtang si Irving mikulit og 28 puntos sa Nets nga mipakgang sa career-high 41 puntos ni Bam Adebayo.
Dili kaayo maayo ang salida ni James Harden kagahapon nga mihipos lang og 12 puntos, 11 ka assists ug pito ka rebounds sa Nets nga nidaog sa unang higayon diin nag-uban og duwa ang ilang tulo ka superstars.
Ang napalig-on nga Nets napilde sa duha ka sunod-sunod nga higayon batok sa Cleveland Cavaliers niadtong miaging semana.
Si Joe Harris mitampo'g 23 puntos, lakip na niini ang pito ka 3-pointers alang sa Brookly nga aduna na'y 10-8 nga baraha.
Sila si Gorac Dragic mipupo og 19 puntos, samtang sila si Kendrick Nunn ug Duncan Robinson parehong mitampo'g 18 puntos sa Heat nga pabiling niduwa nga wala silang Butler ug Tyler Herro.
Sa laing mga aksiyon, ang Philadelphia 76ers pabiling nagkupot sa liderato sa Eastern Conference human nidaog batok sa Detroit Pistons, 114-110.
Ang 76ers nagbitbit na karon og 12-5 nga baraha, samtang ang Pistons nangiwit sa standing uban ang 3-13 win-loss record.
Midaog sab ang Minnesota Timberwolves batok sa New Orleans Pelicans, 120-110, ang Utah Jazz wa'y puangod nga milubong sa Golden State Warriors, 127-108 ug ang Houston Rockets wa'y kulaluoy nga nimasaker sa Dallas Mavericks, 133-108.
- Latest