Trojans,Naki Warriors mibahin sa ilang duwa sa PCAP chessfest
CEBU, Philippines — Ang mga pambato sa Sugbo nga Toledo City Trojans ug Lapu-Lapu City Naki Warriors mibahin sa ilang mga duwa sa nagpadayong aksiyon sa All-Filipino Conference sa labing unang Professional Chess Association of the Philippines (PCAP) online tournament nga giduwa niadtong Sabado sa gabii pinaagi sa lichess platform.
Ang Trojans nga gitimon nilang playing team manager Felix Poloyapoy Jr. ug team captain Bonn Rainauld Tibod miyukbo ngadto sa Negros Kingsmen sa sikit nga desisyon, 9.5-11.5.
Bisan tuod napilde, ang Trojans ni team owner Engr. Mardee Gacang De la Peña mapasigarbuhon gihapon gumikan sa pagwadwad nila og malisud nga hagit batok sa usa ka dekalibreng Negros nga koponan nga namongingi og titled players sama nilang FIDE Masters Nelson Mariano III, Rosendo B. Bandal Jr. ug FM Randy Segarra.
Labing mahinungdanon sa tanan, ang Trojans wala magpaapekto sa maong kapildihan gumikan kay nakabawi dayon sila pinaagi sa pagpakgang sa Surigao Fianchetto Checkmates, 15.5-8.5.
Ang Trojans nagtabla karon og ang Naki Warriors sa Lapu-Lapu bitbit ang managsamang 3-2 nga baraha. Ila karong gisaw-an ang ikaupat ug ikalimang dapit sunod sa wa'y pildeng Camarines Soaring Eagles, Iloilo Kisela Knights ug Negros Kingsmen sa Southern Conference standings.
Ang Naki Warriors, nga gibidahan nilang NM Merben Roque ug playing team owner Aldwin Daculan mipilde sa Cebu City Machers, 13-8, apan gipakaging sab sila sa Iloilo, 5-16. Samtang ang Machers nga gipangulohan nilang NM Elwin Retanal ug Anthony Makinano padayong misukarap human nakatilaw sa ikalima niining sagunson nga pilde sa mga kamot sa hait nga Negros, 3-18.
- Latest
