Toledo Trojans mipatigbabaw na sab sa all-Cebu duel sa 1st PCAP tourney
CEBU, Philippines — Ang Toledo City Trojans nagmadaugon sa laing all-Cebuano showdown, ning higayona batok sa Lapu-Lapu City Naki Warriors sa All-Filipino Conference sa labing unang Professional Chess Association of the Philippines (PCAP) online tournmament nga giduwa pinaagi sa lichess.org niadtong Huwebes sa gabii.
Gipangulohan nilang International Master Rico Mascariñas ug National Masters Rommel Ganzon ug Rogelio Enriquez Jr., ang Trojans ni team owner Engr. Mardee Gacang De la Peña mipakgang sa Lapu-Lapu Naki Warriors nga gitimon ni NM Merben Roque, 14.5-6.5.
Ang Trojans, nga miabli sa ilang kampanya pinaagi sa pagkulit og 13-8 nga daog batok sa Cebu City Machers ni team captain NM Elwin Retanal. Dili hinuon kalipay tanan ang gibati sa Trojans gumikan kay sa sayo pa nasugamak sila sa mga kamot sa Ilolilo Kisela Knights, 16-5. Mibida sa Iloilo mao sila si Grandmaster Joey Antonio ug NM Cesar Mariano.
Ang Toledo kasamtangang nagkupot og 2-1 win-loss record sama sa katagilungsod niining Cordova Dutchess Dagami Warriors. Ang Cordova miyukbo ngadto sa Camarines, 16-5, apan dali kaayong nakabawi pinaagi sa pagpaksit sa Zamboanga, 13-8.
Sa laing resulta, ang Cebu City Machers padayong nagkagidlay human gilampaso sa Iloilo Knights, 19-2.
- Latest