Estilo ni Pacquiao pinag-aaralan na ni McGregor

MANILA, Philippines — Ngayon pa lang, naghahanda na si Ultimate Figh­ting Championship (UFC) superstar Conor McGregor para sa ikinakasang laban nito kay eight-division world champion Manny Pacquiao.

Sa katunayan, sumasalang na si McGregor sa sparring session laban sa mga kaliweteng boksingero gaya ni Pacquiao.

Sinasanay na nito ang kanyang sarili sa pagharap sa mga sparmates na may estilong maihahalintulad sa Pinoy boxing legend.

Maliban sa mga southpaw boxers, kumukuha rin ito ng sparring mates na kasing taas ni Pacquiao.

“I have been fighting professional boxers in the gym, sparring with southpaw bo­xers in the gym in preparation not just for Dustin but Manny. I’ve had shorter 5’5 rockets coming at me, you know what I mean,” wika ni McGregor sa panayam ng sports.net.ca.

Mismong si McGregor na ang nagkumpirma na halos selyado na ang nakatakdang pakikipagtuos nito kay Pacquiao.

Inaasahang ilalatag na ang lahat sa oras na makatapos ang laban nito kay Dustin Poirier na gaganapin sa Linggo sa Abu Dhabi, United Arab Emirates.

Abot-kamay na ang Pacquiao-McGregor fight na inaasahang tatabo sa takilya lalo pa’t pareho namang interesado ang magkabilang kampo para matuloy ito.

Planong idaos ang laban sa Middle East sa Abril o Mayo ng taong ito.

Ang McGregor fight ay isa lamang sa dalawang big bouts na target ng kampo ni Pacquiao sa 2021.