Nuggets mipahilom sa Thunder

CEBU, Philippines — Guwardiya sa Denver Nuggets nga si Nikola Jokic misakmit og 27 puntos ug milangkat og 12 ka rebounds alang sa 119-101 nga kadaogan batok sa Oklahoma City Thunder sa nagkainit nga aksiyon sa National Basketball Association kagahapon didto sa Denver.

Si Jokic mitunol sab og unom ka assists ug dihang kontrolado nila ang duwa sa fourth period, gipalingkod na lang siya ug ubang mga starter sa Nuggets. Ang reserve nga si Monte Morris miamot og 15 puntos, samtang sila si Paul Millsap ug Will Barton mitampo'g 13 puntos matag usa alang sa Nuggets, kinsa nidaog sa ikaunom nga sunod-sunod nga higayon  batok sa Thunder sa ilang balwarte.

Gipangulohan ni Luguentz Dort ang Thunder pinaagi sa iyang 20 puntos, lima ka rebounds ug tulo ka assists, gisundan ni Shai Gilgeous-Alexander sa iyang 14 puntos, lima ka rebounds ug pito ka assists. Si Darius Bazley miamot og 12 puntos sa naparot nga Thunder.

Si Donovan Mitchell mipugnit og 28 puntos aron pangulohan ang Utah Jazz ngadto sa ikaunom nga sunod-sunod nga daog batok sa New Orleans Hornets, 118-102.

Nihipos na og 15 puntos si Mitchell sa unang kuwarter ug kausa lang masipyat sa pito niya ka itsa gikan sa field. Si Mitchell mihimo sab og pito ka rebounds ug upat ka assists.

Ang sentro nga si Rudy Gobert miabuno'g 13 puntos, 18 ka rebounds ug tulo ka blocked shots.

Gikan sa bench, si Jordan Clarkson mitampo'g 18 puntos ug ang reserve nga si Joe Ingles, kinsa nibalik human mapalta og tulo ka duwa  tungod sa Achilles tendon injury, miposa og 15 puntos alang sa Jazz nga miinat sa ilang rekord ngadto sa 10-4 aron makigsawo sa Los Angeles Clippers alang sa ikaduhang dapit sa Western Conference sunod sa 11-4 nga LA Lakers.